B1 – Nere etxea

1-Ke urdin bat zarion etxe kaxkoari
xoriak zuhaitzetan ziren kantuz ari:
nere etxea
xuri, gorri zoin eder zitzaitan ageri.

2-Mendi larrutu azpi xoragarri hartan
kaxko gorri batekin agertzen zitzaitan.
Nere etxea
agertzen zitzaitan bai…, bainan ametsetan.

3-Ardura ustez-eta hegazpean nintzen
hasperenka jarririk nunbait naiz atzartzen:
“Nere etxea
ametsezkoa baizik ondikotz! ez hintzen…”

4-Munduratuz geroztik hirian naiz bizi.
Etxerik ez baitugu etxez etxe goazi.
Nere etxea
haurrean zoin zen ere dut ahantzi.

5- Ez naite bozkaria herrirat joan arte.
Egoitza triste hura zertako dut maite?
“Nere etxea”
dut bihotzean deitzen; zertako ba ote?

6- Oi, amattoren begi ñabar ezti hori
non ote da? Non? Ez zait aspaldi ageri
nere etxea,
betiko udaberri neri irriz ari.

Hiztegia
nere: Euskaltzaindiaren hiztegian agertzen diren formak nire eta ene dira.
ondikotz: maleruski, zoritxarrez – Euskaltzaindiaren hiztegian: ondikoz

Iratzeder (Jean Diharce)
Biziaren olerkia liburutik
1983, Gero Euskal liburuak Ed. Mensajero