B1 – Gorka Egia, Ekologista naiz baina…

Inkesta guzien arabera, gehienok oso arduratuak gara Lur planetaren egoeraz. Egunero, komunikabide eta sare sozial guzietan, klima aldaketa, itsas mailaren igoera, ozono geruzaren zuloa edota espezie bizidunen desagertzea bezalako gaiak agertzen dira; egunero errana zaigu ezin dugula berdin jarraitu.

Hitz biribil asko, baina ganoranzko ekintza guti sumatzen dut nire inguruan. Azaleko aldaketa batzuk kenduta, gure jardunak lehen bezala segitzen du kasu gehienetan.

Nire kasuaz hitz egingo dut, nire esperientziaz. Nire kontsumitzeko modua ez da batere jasangarria izan. Pentsatu, sentitu eta egiten nuenaren artean kontraesan handiak izan ditut. Nire kontraesan hauetatik ikasten ari naiz, eta errango nuke ez naizela halako egoeran den pertsona bakarra. Munduko oihanen desagertzeaz kezkatua nintzen, baina palma-olioa duten elikagaiak erosiz; ozono geruzaren egoerak, poloen urtzeak eta airearen kutsadurak aztoratua, baina hegazkina hartuz hurbileko bidaietan, trena hartu beharrean; zaborraren arazoez oharturik baina organikoa bereizteko gogorik gabe.

Bertako ekoizleak babestu nahian baina produktuaren jatorriari begiratu gabe erosiz.

Ingurumena babestearen alde nintzen erabat, baina nire jokabideak justu kontrakoa adierazten zuen.

Egun batean erran nuen: ekologista naiz, baina… nire eguneroko kontsumoa ingurumenaren aldekoa da?

Ekologista naiz baina 
Gorka Egia Arregi (Ikasek moldatua)